ياخليف براس الرجم عييت أعـدى=وأونست أنافي مشية الرجل تقصير
واليوم ممشاهـا نقـص ومتـردي=من عقب مانمشي على الرجل ونغير
مثل الجزور اللـي تٌثُـوُتْ تـردِي=ماتنوض لو ترعى من العشب نوير
من عقَب التسعيـن مابـه مسـدي=مثل الطوير اللي يدورج ولا يطيـر
فارق ركـوب مزهيـات الآشـدي=لاجاذب دلو ً ولاشـرب مـن بيـر
متكعمـس يتنـى نوالـه يـمـدي=النفس صغرت والجسم غاد صغيـر
يمشي على العجرى يحوز ويضدي=وركب على عيونه قزاز ومناظيـر
وجـداه يـادوراً لنـا لـو يـردي=يـوم البـداه ومنزلـن بالعثامـيـر
بيـوت بـدو وبابـهـم مـايـردي=وبيوتهـم شغـل البنـات الغناديـر
هوريف طرقي الخـلا المستحـدي=زبن الضعيف وريف ضيف ومسايير
اليا لاح بـرق وصوتـوا بالمشـدي=عسوسهم قدم السلـف والمظاهيـر
وقدم السلف كلـن بطيـره يهـدي=مع النشر يازيـن نـح الصقاقيـر
يبـون دياراً عشبـهـا مستـجـدي=بركون حزمـن مدهـل للخواويـر
اللي عرقهـن عنبـرن فيـه نـدي=وأخير من ريحـة زبـاد بقواريـر
عـزالله انـه ريـف قلبـي وودي=بجفريتن ياخليف غنى بهـا الطيـر
مـن نـو براقـن خيالـه مسـدي=وعطورهاعشب النفـل بالمحاييـر
واليـوم طحنـا طيحتـن مانشـدي=وبنيت قصر بقبلة الغـرس والبيـر
ودنيـا كفـى الله شرهـا ماتمـدي=وين انت وين احبابنا اللي بهم خيـر
اللي علـى كـل اللـوازم تسـدي=اهل الشرف واهل الوجيه المناويـر
وجتهـم مفرقـه الغـلا والمـودي=ورسومهم تبني عليهـا المعاصيـر
وراحوا ولامنهـم سلامـن يــردي=بحكمـة الواحـد ولـي المقاديـر
وباكر ترانا مـع بثـرهـم نـشـدي=يـارب تامرنا علـى كاتـب الخيـر
ومن مات يضرب دربهم مايصـدي=ويفـارق الدنيـا مـراح ومشاويـر